Text Browser | BHS | Parallel | KJV | Accents | Forms | Q-K | Diacritics | Hermeneutics |
Amos 7 | Ch- | Bk- | Save As | Bk+ | Ch+ | עמוס |
1 כ֤ה הרא֙ני֙ אדנ֣י יהו֔ה והנה֙ יוצ֣ר גב֔י בתחל֖ת על֣ות הל֑קש וה֨נה־ל֔קש אח֖ר גז֥י המֽלך׃ 2 והי֗ה אם־כלה֙ לֽאכול֙ את־ע֣שב הא֔רץ ואמ֗ר אדנ֤י יהוה֙ סֽלֽח־נ֔א מ֥י יק֖ום יֽעק֑ב כ֥י קט֖ן הֽוא׃ 3 נח֥ם יהו֖ה על־ז֑את ל֥א תהי֖ה אמ֥ר יהוֽה׃ 4 כ֤ה הרא֙ני֙ אדנ֣י יהו֔ה והנ֥ה קר֛א לר֥ב בא֖ש אדנ֣י יהו֑ה ות֙אכל֙ את־תה֣ום רב֔ה ואכל֖ה את־החֽלק׃ 5 ואמ֗ר אדנ֤י יהוה֙ חדל־נ֔א מ֥י יק֖ום יעק֑ב כ֥י קט֖ן הֽוא׃ 6 נח֥ם יהו֖ה על־ז֑את גם־היא֙ ל֣א תֽהי֔ה אמ֖ר אדנ֥י יהוֽה׃ 7 כ֣ה הרא֔ני והנ֧ה אדנ֛י נצ֖ב על־חומ֣ת אנ֑ך וביד֖ו אנֽך׃ 8 וי֨אמר יהו֜ה אל֗י מֽה־את֤ה ראה֙ עמ֔וס ואמ֖ר אנ֑ך וי֣אמר אדנ֗י הננ֨י ש֤ם אנך֙ בק֙רב֙ עמ֣י ישרא֔ל לֽא־אוס֥יף ע֖וד עב֥ור לֽו׃ 9 ונש֙מו֙ במ֣ות ישח֔ק ומקדש֥י ישרא֖ל יחר֑בו וקמת֛י על־ב֥ית ירבע֖ם בחֽרב׃ 10 וישל֗ח אמציה֙ כה֣ן בֽית־א֔ל אל־ירבע֥ם מֽלך־ישרא֖ל לאמ֑ר קש֨ר על֜יך עמ֗וס בק֙רב֙ ב֣ית ישרא֔ל לא־תוכ֣ל הא֔רץ להכ֖יל את־כל־דברֽיו׃ 11 כי־כה֙ אמ֣ר עמ֔וס בח֖רב ימ֣ות ירבע֑ם וי֨שרא֔ל גל֥ה יגל֖ה מע֥ל אדמתֽו׃ 12 וי֤אמר אמציה֙ אל־עמ֔וס חז֕ה ל֥ך ברח־לך֖ אל־א֣רץ יהוד֑ה ואכל־ש֣ם ל֔חם וש֖ם תנבֽא׃ 13 ובֽית־א֔ל לֽא־תוס֥יף ע֖וד להנב֑א כ֤י מקדש־מ֙לך֙ ה֔וא וב֥ית ממלכ֖ה הֽוא׃ 14 וי֤ען עמוס֙ וי֣אמר אל־אמצי֔ה לא־נב֣יא אנ֔כי ול֥א בן־נב֖יא אנ֑כי כֽי־בוק֥ר אנ֖כי ובול֥ס שקמֽים׃ 15 ויקח֣ני יהו֔ה מאחר֖י הצ֑אן וי֤אמר אלי֙ יהו֔ה ל֥ך הנב֖א אל־עמ֥י ישראֽל׃ 16 ועת֖ה שמ֣ע דבר־יהו֑ה את֣ה אמ֗ר ל֤א תנבא֙ על־ישרא֔ל ול֥א תט֖יף על־ב֥ית ישחֽק׃ 17 לכ֞ן כה־אמ֣ר יהו֗ה אשתך֞ בע֤יר תזנה֙ ובנ֤יך ובנת֙יך֙ בח֣רב יפ֔לו ואדמתך֖ בח֣בל תחל֑ק ואת֗ה על־אדמ֤ה טמאה֙ תמ֔ות וי֨שרא֔ל גל֥ה יגל֖ה מע֥ל אדמתֽו׃