Text Browser | BHS | Parallel | KJV | Accents | Forms | Q-K | Diacritics | Hermeneutics |
Psalms 38 | Ch- | Bk- | Save As | Bk+ | Ch+ | תהלים |
1 מזמ֖ור לדו֣ד להזכֽיר׃ 2 יֽהו֗ה אל־בקצפך֥ תוכיח֑ני וֽבחמתך֥ תיסרֽני׃ 3 כֽי־ח֭ציך נ֣חתו ב֑י ותנח֖ת על֣י ידֽך׃ 4 אין־מת֣ם ב֭בשרי מפנ֣י זעמ֑ך אין־של֥ום ב֝עצמ֗י מפנ֥י חטאתֽי׃ 5 כ֣י ע֭ונתי עבר֣ו ראש֑י כמש֥א כ֝ב֗ד יכבד֥ו ממֽני׃ 6 הבא֣ישו נ֭מקו חבורת֑י מ֝פנ֗י אולתֽי׃ 7 נעו֣יתי שח֣תי עד־מא֑ד כל־ה֝י֗ום קד֥ר הלֽכתי׃ 8 כֽי־כ֭סלי מלא֣ו נקל֑ה וא֥ין מ֝ת֗ם בבשרֽי׃ 9 נפוג֣ותי ונדכ֣יתי עד־מא֑ד ש֝א֗גתי מֽנהמ֥ת לבֽי׃ 10 אֽדני נגדך֥ כל־תאות֑י ו֝אנחת֗י ממך֥ לא־נסתֽרה׃ 11 לב֣י ס֭חרחר עזב֣ני כח֑י וֽאור־עינ֥י גם־ה֝֗ם א֣ין אתֽי׃ 12 אֽהב֨י׀ ורע֗י מנ֣גד נגע֣י יעמ֑דו ו֝קרוב֗י מרח֥ק עמֽדו׃ 13 וינקש֤ו׀ מבקש֬י נפש֗י ודרש֣י ר֭עתי דבר֣ו הו֑ות ו֝מרמ֗ות כל־הי֥ום יהגֽו׃ 14 ואנ֣י כ֭חרש ל֣א אשמ֑ע ו֝כאל֗ם ל֣א יפתח־פֽיו׃ 15 ואה֗י כ֭איש אש֣ר לא־שמ֑ע וא֥ין ב֝פ֗יו תוכחֽות׃ 16 כֽי־לך֣ יהו֣ה הוח֑לתי את֥ה ת֝ענ֗ה אדנ֥י אלהֽי׃ 17 כֽי־א֭מרתי פן־ישמחו־ל֑י במ֥וט ר֝גל֗י על֥י הגדֽילו׃ 18 כֽי־א֭ני לצ֣לע נכ֑ון ומכאוב֖י נגד֣י תמֽיד׃ 19 כֽי־עונ֥י אג֑יד א֝דא֗ג מֽחטאתֽי׃ 20 וֽ֭איבי חי֣ים עצ֑מו ורב֖ו שנא֣י שֽקר׃ 21 ומשלמ֣י ר֭עה ת֣חת טוב֑ה י֝שטנ֗וני ת֣חת רֽדפי־טֽוב׃ 22 אל־תֽעזב֥ני יהו֑ה א֝לה֗י אל־תרח֥ק ממֽני׃ 23 ח֥ושה לעזרת֑י א֝דנ֗י תשועתֽי׃