Text Browser | BHS | Parallel | KJV | Accents | Forms | Q-K | Diacritics | Hermeneutics |
Psalms 84 | Ch- | Bk- | Save As | Bk+ | Ch+ | תהלים |
1 למנצ֥ח עֽל־הגת֑ית לבני־ק֥רח מזמֽור׃ 2 מה־ידיד֥ות משכנות֗יך יהו֥ה צבאֽות׃ 3 נכספ֬ה וגם־כלת֨ה׀ נפשי֘ לחצר֪ות יה֫ו֥ה לב֥י ובשר֑י י֝רננ֗ו א֣ל אֽל־חֽי׃ 4 גם־צפ֨ור׀ מ֪צאה ב֡ית ודר֤ור׀ ק֥ן לה֘ אשר־ש֪תה אפר֫ח֥יה אֽת־מ֭זבחותיך יהו֣ה צבא֑ות מ֝לכ֗י ואלהֽי׃ 5 א֭שרי יושב֣י בית֑ך ע֝֗וד יֽהלל֥וך סֽלה׃ 6 אשר֣י א֭דם עֽוז־ל֥ו ב֑ך מ֝סל֗ות בלבבֽם׃ 7 עבר֤י׀ בע֣מק ה֭בכא מעי֣ן ישית֑והו גם־ב֝רכ֗ות יעט֥ה מורֽה׃ 8 י֭לכו מח֣יל אל־ח֑יל ירא֖ה אל־אלה֣ים בציֽון׃ 9 יה֮ו֤ה אלה֣ים צ֭באות שמע֣ה תפלת֑י האז֨ינה אלה֖י יעק֣ב סֽלה׃ 10 מ֭גננו רא֣ה אלה֑ים ו֝הב֗ט פנ֣י משיחֽך׃ 11 כ֤י טֽוב־י֥ום בחצר֗יך מ֫א֥לף בח֗רתי ה֭סתופף בב֣ית אלה֑י מ֝ד֗ור באהלי־רֽשע׃ 12 כ֤י ש֨מש׀ ומגן֘ יהו֪ה אל֫ה֥ים ח֣ן ו֭כבוד ית֣ן יהו֑ה ל֥א ימנע־ט֝֗וב לֽהלכ֥ים בתמֽים׃ 13 יהו֥ה צבא֑ות אֽשר֥י א֝ד֗ם בט֥ח בֽך׃