Text Browser | BHS | Parallel | KJV | Accents | Forms | Q-K | Diacritics | Hermeneutics |
Psalms 92 | Ch- | Bk- | Save As | Bk+ | Ch+ | תהלים |
1 מזמ֥ור ש֗יר לי֣ום השבֽת׃ 2 ט֗וב להד֥ות ליהו֑ה ולזמ֖ר לשמך֣ עליֽון׃ 3 להג֣יד בב֣קר חסֽד֑ך ו֝אמֽונתך֗ בלילֽות׃ 4 עֽלי־ע֭שור ועלי־נ֑בל על֖י הגי֣ון בכנֽור׃ 5 כ֤י שמחת֣ני יהו֣ה בפעל֑ך בֽמעש֖י יד֣יך ארנֽן׃ 6 מה־גדל֣ו מעש֣יך יהו֑ה מ֝א֗ד עמק֥ו מחשבתֽיך׃ 7 אֽיש־ב֭ער ל֣א יד֑ע ו֝כס֗יל לא־יב֥ין את־זֽאת׃ 8 בפר֤ח רשע֨ים׀ כמ֥ו ע֗שב ו֭יציצו כל־פ֣עלי א֑ון להשֽמד֥ם עדי־עֽד׃ 9 ואת֥ה מר֗ום לעל֥ם יהוֽה׃ 10 כ֤י הנ֪ה איב֡יך׀ יֽהו֗ה כֽי־הנ֣ה איב֣יך יאב֑דו י֝תפרד֗ו כל־פ֥עלי אֽון׃ 11 ות֣רם כרא֣ים קרנ֑י ב֝לת֗י בש֣מן רענֽן׃ 12 ותב֥ט עינ֗י בש֫ור֥י בקמ֖ים על֥י מרע֗ים תשמ֥ענה אזנֽי׃ 13 צ֭דיק כתמ֣ר יפר֑ח כא֖רז בלבנ֣ון ישגֽה׃ 14 ש֭תולים בב֣ית יהו֑ה בחצר֖ות אלה֣ינו יפרֽיחו׃ 15 ע֖וד ינוב֣ון בשיב֑ה דשנ֖ים ורֽעננ֣ים יהיֽו׃ 16 ל֭הגיד כֽי־יש֣ר יהו֑ה צ֝ור֗י וֽלא־עול֥תה בֽו׃