| Text Browser | BHS | Parallel | KJV | Accents | Forms | Q-K | Diacritics | Hermeneutics |
| Job 39 | Ch- | Bk- | Save As | Bk+ | Ch+ | איוב |
1 היד֗עת ע֭ת ל֣דת יעלי־ס֑לע חל֖ל איל֣ות תשמֽר׃ 2 תספ֣ר ירח֣ים תמל֑אנה ו֝יד֗עת ע֣ת לדתֽנה׃ 3 ת֭כרענה ילדיה֣ן תפל֑חנה חבליה֥ם תשלֽחנה׃ 4 יחלמ֣ו ב֭ניהם ירב֣ו בב֑ר י֝צא֗ו ולא־ש֥בו לֽמו׃ 5 מֽי־של֣ח פ֣רא חפש֑י ומסר֥ות ע֝ר֗וד מ֣י פתֽח׃ 6 אשר־ש֣מתי ערב֣ה בית֑ו וֽמשכנות֥יו מלֽחה׃ 7 י֭שחק להמ֣ון קרי֑ה תשא֥ות נ֝וג֗ש ל֣א ישמֽע׃ 8 ית֣ור הר֣ים מרע֑הו ואח֖ר כל־יר֣וק ידרֽוש׃ 9 הי֣אבה ר֣ים עבד֑ך אם־י֝ל֗ין על־אבוסֽך׃ 10 הֽתקשר־ר֭ים בת֣לם עבת֑ו אם־ישד֖ד עמק֣ים אחרֽיך׃ 11 הֽתבטח־ב֖ו כי־ר֣ב כח֑ו ותעז֖ב אל֣יו יגיעֽך׃ 12 התאמ֣ין ב֖ו כי־יש֣יב זרע֑ך וֽגרנך֥ יאסֽף׃ 13 כנף־רננ֥ים נעל֑סה אם־א֝בר֗ה חסיד֥ה ונצֽה׃ 14 כֽי־תעז֣ב לא֣רץ בצ֑יה וֽעל־עפ֥ר תחמֽם׃ 15 ו֭תשכח כי־ר֣גל תזור֑ה וחי֖ת השד֣ה תדושֽה׃ 16 הקש֣יח בנ֣יה ללא־ל֑ה לר֖יק יגיע֣ה בלי־פֽחד׃ 17 כֽי־הש֣ה אל֣וה חכמ֑ה ולא־ח֥לק ל֝֗ה בבינֽה׃ 18 כ֭עת במר֣ום תמר֑יא תֽשח֥ק ל֝ס֗וס ולרֽכבֽו׃ 19 התת֣ן לס֣וס גבור֑ה התלב֖יש צואר֣ו רעמֽה׃ 20 הֽ֭תרעישנו כארב֑ה ה֖וד נחר֣ו אימֽה׃ 21 יחפר֣ו ב֭עמק ויש֣יש בכ֑ח י֝צ֗א לקראת־נֽשק׃ 22 ישח֣ק ל֭פחד ול֣א יח֑ת ולֽא־י֝ש֗וב מפני־חֽרב׃ 23 ע֭ליו תרנ֣ה אשפ֑ה ל֖הב חנ֣ית וכידֽון׃ 24 בר֣עש ו֭רגז יגמא־א֑רץ ולֽא־י֝אמ֗ין כי־ק֥ול שופֽר׃ 25 בד֤י שפ֨ר׀ י֮אמ֤ר הא֗ח וֽ֭מרחוק יר֣יח מלחמ֑ה ר֥עם ש֝רים ותרועֽה׃ 26 הֽ֭מבינ֣תך יֽאבר־נ֑ץ יפר֖ש כנפ֣יו לתימֽן׃ 27 אם־על־פ֭יך יגב֣יה נ֑שר ו֝כ֗י יר֥ים קנֽו׃ 28 ס֣לע י֭שכן ויתלנ֑ן עֽל־שן־ס֝֗לע ומצודֽה׃ 29 מש֥ם חֽפר־א֑כל ל֝מרח֗וק עינ֥יו יבֽיטו׃ 30 ואפרח֥יו יעלעו־ד֑ם ובאש֥ר ח֝לל֗ים ש֣ם הֽוא׃