Text Browser | BHS | Parallel | KJV | Accents | Forms | Q-K | Diacritics | Hermeneutics |
Job 4 | Ch- | Bk- | Save As | Bk+ | Ch+ | איוב |
1 ו֭יען אליפ֥ז הֽתימנ֗י ויאמֽר׃ 2 הנס֬ה דב֣ר אל֣יך תלא֑ה ועצ֥ר ב֝מל֗ין מ֣י יוכֽל׃ 3 ה֭נה יס֣רת רב֑ים ויד֖ים רפ֣ות תחזֽק׃ 4 כ֖ושל יקימ֣ון מל֑יך וברכ֖ים כרע֣ות תאמֽץ׃ 5 כ֤י עת֨ה׀ תב֣וא אל֣יך ות֑לא תג֥ע ע֝ד֗יך ותבהֽל׃ 6 הל֣א י֭ראתך כסלת֑ך ת֝קותך֗ ות֣ם דרכֽיך׃ 7 זכר־נ֗א מ֤י ה֣וא נק֣י אב֑ד ו֝איפ֗ה ישר֥ים נכחֽדו׃ 8 כאש֣ר ר֭איתי ח֣רשי א֑ון וזרע֖י עמ֣ל יקצרֽהו׃ 9 מנשמ֣ת אל֣וה יאב֑דו ומר֖וח אפ֣ו יכלֽו׃ 10 שאג֣ת א֭ריה וק֣ול ש֑חל ושנ֖י כפיר֣ים נתֽעו׃ 11 ל֭יש אב֣ד מבלי־ט֑רף ובנ֥י ל֝ב֗יא יתפרֽדו׃ 12 ו֭אלי דב֣ר יגנ֑ב ותק֥ח א֝זנ֗י ש֣מץ מֽנהֽו׃ 13 ב֭שעפים מחזינ֣ות ל֑ילה בנפ֥ל ת֝רדמ֗ה על־אנשֽים׃ 14 פ֣חד ק֭ראני ורעד֑ה ור֖ב עצמות֣י הפחֽיד׃ 15 ו֭רוח על־פנ֣י יחל֑ף ת֝סמ֗ר שֽער֥ת בשרֽי׃ 16 יעמ֤ד׀ וֽלא־אכ֬יר מרא֗הו ת֭מונה לנ֣גד עינ֑י דממ֖ה וק֣ול אשמֽע׃ 17 הֽ֭אנוש מאל֣וה יצד֑ק א֥ם מ֝עש֗הו יטהר־גֽבר׃ 18 ה֣ן ב֭עבדיו ל֣א יאמ֑ין ו֝במלאכ֗יו יש֥ים תהלֽה׃ 19 א֤ף׀ שכנ֬י בֽתי־ח֗מר אשר־בעפ֥ר יסוד֑ם י֝דכא֗ום לפני־עֽש׃ 20 מב֣קר לע֣רב יכ֑תו מבל֥י מ֝ש֗ים לנ֥צח יאבֽדו׃ 21 הלא־נס֣ע יתר֣ם ב֑ם י֝מ֗ותו ול֣א בחכמֽה׃