| Text Browser | BHS | Parallel | KJV | Accents | Forms | Q-K | Diacritics | Hermeneutics |
| Song of Songs 5 | Ch- | Bk- | Save As | Bk+ | Ch+ | שיר השירים |
1 ב֣אתי לגני֘ אחת֣י כלה֒ אר֤יתי מורי֙ עם־בשמ֔י אכ֤לתי יערי֙ עם־דבש֔י שת֥יתי יינ֖י עם־חלב֑י אכל֣ו רע֔ים שת֥ו ושכר֖ו דודֽים׃ 2 אנ֥י ישנ֖ה ולב֣י ע֑ר ק֣ול׀ דוד֣י דופ֗ק פתחי־ל֞י אחת֤י רעיתי֙ יונת֣י תמת֔י שראשי֙ נמלא־ט֔ל קוצות֖י רס֥יסי לֽילה׃ 3 פש֙טתי֙ את־כתנת֔י איכ֖כה אלבש֑נה רח֥צתי את־רגל֖י איכ֥כה אטנפֽם׃ 4 דוד֗י של֤ח ידו֙ מן־הח֔ר ומע֖י המ֥ו עלֽיו׃ 5 ק֥מתֽי אנ֖י לפת֣ח לדוד֑י ויד֣י נֽטפו־מ֗ור ואצבעתי֙ מ֣ור עב֔ר ע֖ל כפ֥ות המנעֽול׃ 6 פת֤חתֽי אני֙ לדוד֔י ודוד֖י חמ֣ק עב֑ר נפשי֙ יֽצא֣ה בדבר֔ו בקשת֙יהו֙ ול֣א מצאת֔יהו קראת֖יו ול֥א ענֽני׃ 7 מצא֧ני השמר֛ים הסבב֥ים בע֖יר הכ֣וני פצע֑וני נשא֤ו את־רדידי֙ מֽעל֔י שמר֖י החמֽות׃ 8 השב֥עתי אתכ֖ם בנ֣ות ירושל֑ם אֽם־תמצאו֙ את־דוד֔י מה־תג֣ידו ל֔ו שחול֥ת אהב֖ה אֽני׃ 9 מה־דוד֣ך מד֔וד היפ֖ה בנש֑ים מה־דוד֣ך מד֔וד שכ֖כה השבעתֽנו׃ 10 דוד֥י צח֙ ואד֔ום דג֖ול מרבבֽה׃ 11 ראש֖ו כ֣תם פ֑ז קוצותיו֙ תלתל֔ים שחר֖ות כעורֽב׃ 12 עינ֕יו כיונ֖ים על־אפ֣יקי מ֑ים רֽחצות֙ בֽחל֔ב ישב֖ות על־מלֽאת׃ 13 לחיו֙ כערוג֣ת הב֔שם מגדל֖ות מרקח֑ים שפתותיו֙ שֽושנ֔ים נטפ֖ות מ֥ור עבֽר׃ 14 ידיו֙ גליל֣י זה֔ב ממלא֖ים בתרש֑יש מעיו֙ ע֣שת ש֔ן מעל֖פת ספירֽים׃ 15 שוקיו֙ עמ֣ודי ש֔ש מיסד֖ים על־אדני־פ֑ז מרא֙הו֙ כלבנ֔ון בח֖ור כארזֽים׃ 16 חכו֙ מֽמתק֔ים וכל֖ו מחמד֑ים ז֤ה דודי֙ וז֣ה רע֔י בנ֖ות ירושלֽם׃