Text Browser | BHS | Parallel | KJV | Accents | Forms | Q-K | Diacritics | Hermeneutics |
2 Chronicles 19 | Ch- | Bk- | Save As | Bk+ | Ch+ | דברי הימים ב |
1 ו֠ישב יהושפ֨ט מֽלך־יהוד֧ה אל־בית֛ו בשל֖ום לֽירושלֽם׃ 2 ויצ֣א אל־פנ֗יו יה֣וא בן־חנ֮ני֘ החזה֒ וי֙אמר֙ אל־המ֣לך יהושפ֔ט הלרש֣ע לעז֔ר ולשנא֥י יהו֖ה תאה֑ב ובזאת֙ על֣יך ק֔צף מלפנ֖י יהוֽה׃ 3 אב֕ל דבר֥ים טוב֖ים נמצא֣ו עמ֑ך כֽי־בע֤רת האשרות֙ מן־הא֔רץ והכינ֥ות לבבך֖ לדר֥ש הֽאלהֽים׃ 4 וי֥שב יהושפ֖ט בירושל֑ם וי֜שב ויצ֣א בע֗ם מבא֥ר ש֙בע֙ עד־ה֣ר אפר֔ים וישיב֕ם אל־יהו֖ה אלה֥י אבותיהֽם׃ 5 ויעמ֨ד שֽפט֜ים בא֗רץ בכל־ער֧י יהוד֛ה הבצר֖ות לע֥יר ועֽיר׃ 6 וי֣אמר אל־השֽפט֗ים ראו֙ מֽה־את֣ם עש֔ים כ֣י ל֧א לאד֛ם תשפט֖ו כ֣י ליהו֑ה ועמכ֖ם בדב֥ר משפֽט׃ 7 ועת֕ה יה֥י פֽחד־יהו֖ה עליכ֑ם שמר֣ו ועש֔ו כֽי־א֞ין עם־יהו֣ה אלה֗ינו עול֛ה ומש֥א פנ֖ים ומקח־שֽחד׃ 8 וג֣ם ב֠ירושלם העמ֨יד יהושפ֜ט מן־הלוי֣ם והכהנ֗ים ומראש֤י האבות֙ לישרא֔ל למשפ֥ט יהו֖ה ולר֑יב ויש֖בו ירושלֽם׃ 9 ויצ֥ו עליה֖ם לאמ֑ר כ֤ה תעשון֙ בירא֣ת יהו֔ה באמונ֖ה ובלב֥ב שלֽם׃ 10 וכל־ריב֩ אשר־יב֨וא עליכ֜ם מאחיכ֣ם׀ הישב֣ים בעריה֗ם בֽין־ד֣ם׀ לדם֘ בין־תור֣ה למצוה֘ לחק֣ים ולמשפטים֒ והזהרת֣ם את֔ם ול֤א יאשמו֙ ליהו֔ה והֽיה־ק֥צף עליכ֖ם ועל־אחיכ֑ם כ֥ה תעש֖ון ול֥א תאשֽמו׃ 11 והנ֡ה אמרי֣הו כהן֩ הר֨אש עליכ֜ם לכ֣ל דבר־יהו֗ה וזבדי֨הו בן־ישמע֜אל הנג֤יד לבית־יהודה֙ לכ֣ל דבר־המ֔לך ושטר֥ים הלוי֖ם לפניכ֑ם חזק֣ו ועש֔ו ויה֥י יהו֖ה עם־הטֽוב׃